بونوسوار صارت بالكوم ... أما السلام أجره على الله
وعمتك جدنايت البوم ... سمي وحفض باسم الله
الوقت ده وقت البردون ... وادي البرول لحقه ف كعبه
وخدني باللك كلمة جون ... وابن الحرام حسبه ربه
صعبان علي جيل اليوم ... خسر وأحواله تحسر
ولعدش ينفع كتر اللوم ... لكن نقول كله مقدر
تلقى الولد تم السبعة ... وعَ الفرير قبل الكتاب
وبعد ما يتم التسعة ... مقدرشي أقولك قلبه داب
سنة فسنه يكبر دي الواد ... مع الشهادة السنويه
ومرة عن مره يزداد ... ويمتحن في البكلوريه
ويروح بها مطرح ما يريد ... ودحنا عارفين أخرتها
ويدور ويفهم أنه السيد ... ما يفتكر شي عاقبتها
تبص في السكه تشوفه ... مسبسب القصه وعاوج
زي القمر وقت كسوفه ... اكمن جيبه صبح رايج
إن كان مرادك تنده له ... لابد ما تقوله منشير
وتشد حيلك وتقف له ... وتعظمه وتديه سفنير
ويسير مع إخوانه المود ... وادي الغرور تالف عقله
ويقول لنفسه أنا فرجود ... ومين هناك حد يسأله
ستشفشي منه غير أوهام ... إلا الشيطان فيه متعشم
ويعش كده كل الأيام ... ويظن انه متعلم